SERIKALI YAAINISHA DAWA MUHIMU ZINAZOPATIKANA MSD.

Waziri wa Afya, Maendeleo ya Jamii,Jinsia, Wazee na Watoto Mhe. Ummy Mwalimu akifafanua hali ya upatikanaji wa dawa nchini  kwa wajumbe wa kamati ya Bunge ya Huduma za jamii nchini  hawapo pichani wakati wa kikao cha kamati ya hiyo kinachoendelea  katika ukumbi wa Bunge la Jamhuri ya Muungano wa Tanzania , katikati aliyekaa ni Naibu Waziri wa Afya Dkt. Faustine Ndugulile.

Naibu Waziri wa Afya, Maendeleo ya Jamii,Jinsia, Wazee na Watoto Dkt. Faustine Ndugulile akichangia mada wakati wa kikao cha kamati ya Bunge ya Huduma za jamii nchini kinachoendelea  katika ukumbi wa Bunge la Jamhuri ya Muungano wa Tanzania , wa kwanza kulia  aliyekaa ni Waziri wa Afya, Maendeleo ya Jamii,Jinsia, Wazee na Watoto Mhe. Ummy Mwalimu.

Mwenyekiti wa kamati ya Bunge ya Huduma za jamii nchini na Mbunge wa Kigoma Kaskazini Bw. Peter Serukamba akitoa mwongozo kwa wajumbe wa kamati ya Bunge ya Huduma za jamii nchini  wakati wa kikao cha kamati hiyo kinachoendelea  katika ukumbi wa Bunge la Jamhuri ya Muungano wa Tanzania ,wa kwanza kulia ni Waziri wa Afya, Maendeleo ya Jamii,Jinsia, Wazee na Watoto Mhe. Ummy Mwalimu.

Katibu Mkuu Wizara ya afya Dkt. Mpoki Ulisubisya aliyesimama  akichangia mada wakati wa kikao cha kamati ya Bunge ya Huduma za jamii nchini kinachoendelea  katika ukumbi wa Bunge la Jamhuri ya Muungano wa Tanzania , waliokaa kulia ni Waziri wa Afya, Maendeleo ya Jamii,Jinsia, Wazee na Watoto  Mhe. Ummy Mwalimu na katikati ni Naibu Waziri wa Afya Dkt. Faustine Ndugulile.

Mganga Mkuu wa Serikali Prof. Mohammed Bakari Kambi aliyesimama akielezea jambo kwa wajumbe wa kamati ya Bunge ya Huduma za jamii wakati wa kikao cha kamati ya hiyo nchini kinachoendelea  katika ukumbi wa Bunge la Jamhuri ya Muungano wa Tanzania .

Mkurugenzi Mkuu wa Bohari ya Dawa nchini (MSD) Bwa. Laurean Bwanakunu akichangia mada wakati wa kikao cha kamati ya Bunge ya Huduma za jamii nchini kinachoendelea  katika ukumbi wa Bunge la Jamhuri ya Muungano wa Tanzania, aliyekaa kulia ni Naibu Waziri wa Afya, Maendeleo ya Jamii,Jinsia, Wazee na Watoto Dkt. Faustine Ndugulile.

NA WAMJW, BUNGENI DODOMA

SERIKALI kupitia Wizara ya Afya imeainisha dawa aina 135 kama dawa muhimu na za kipaumbele cha wizara  kwa lengo la kuhakikisha kuwa zinapatikana  nyakati zote katika bohari zote za kanda za MSD.

Hayo yameelezwa leo na Waziri wa Afya,Maendeleo ya Janii,Jinsia,Wazee na Watoto Ummy Mwalimu wakati  akitoa taarifa ya utendaji ya Bohari Kuu ya Dawa nchini(MSD)  aliyowasilisha katika kamati ya kudumu ya Bunge huduma na maendeleo ya jamii jijini Dodoma.

Waziri Ummy alisema tathimini ya upatikanaji wa dawa hizo  ni wa hadi mwezi Julai 2018  ambapo ni sawa na asilimia 93 hivyo Wizara yake imeitaka MSD kuongeza idadi ya dawa muhimu 177  na kufikia  dawa za kipaumbele 312 ambapo upatikanaji wa dawa hizo ni asilimia 73 kufikia robo mwaka ya kwanza ya mwaka wa fedha 2018/2019.

“Hali ya upatikanaji dawa muhimu  umeimarika kuanzia mwaka 2016/2017  na kufikia asilimia 93 nchi nzima  katika mwaka 2017/2018  na hivyo kuweza kufanikiwa  katika maeneo mengi na kufikisha  dawa moja kwa moja katika vituo  vya kutolea huduma za afya nchi nzima”.Alisema Waziri Ummy Mwalimu.

Aidha, Waziri Ummy alisema MSD imeweza kusambaza dawa moja kwa moja hadi vituo vya kutolea huduma za afya vinavyofikia 5,432 nchi nzima kwa kutumia magari  215 na hivyo kusambaza dawa zenye thamani za shilingi bilionini 600 kwa mwaka kupitia mfumo wa ugavi ulio enea nchi nzima.

Hata hivyo Waziri Ummy amesema kuwa hivi sasa MSD inapeleka dawa mara 6 kwa mwaka na pale kwenye mahitaji ya dharura tofauti na zamani ambapo ilikua inapeleka dawa mara nne kwa mwaka.

Mbali na hayo Waziri Ummy alisema Bohari ya dawa imeendelea kuimarika kifedha katika kipindi cha miaka mitano iliyopita hususan katika mwaka wa fedha 2017/2018 ambapo Serikali iliongeza bajeti ya dawa, vifaa na vifaa tiba  na kuweza kutoa kiasi cha shilingi bilioni 80.1  na kwa mwaka wa bajeti 2018/2019 kwa robo hii ya mwaka imepokea shilingi bilioni 20.

Kwa upande wake Naibu Waziri wa Afya,Maendeleo ya Jamii, Jinsia,Wazee na Watoto Dkt. Faustine Ndugulile amewataka wafamasia wote wa Hospitali na vituo vya afya kupeleka orodha ya dawa  zilizopo kwenye stoo  kwa madaktari  kila mwanzo wa wiki.

“Wafamasia wote wa Hospitali na zahanati za Serikali wanatakiwa kuwapelekea madaktari orodha ya dawa zilizopo kwenye stoo ili kama dawa ya ugonjwa Fulani haipo Daktari awe na uwezo wa kuandika dawa mbadala kwa mgonjwa” amesema Dkt. Ndugulile.

Naye Mkurugenzi Mkuu wa Bohari ya dawa nchini Bw. Laurean Bwanakunu amesema kuwa katika kuhakikisha upatikanaji wa dawa unadumu nchini wapo katika hatua za mwisho za kukamilisha ubia kati ya Serikali na Sekta binafsi kujenga kiwanda cha dawa nchini.

“Tunatarajia mpaka kufikia Machi 2019 kukamilisha ubia kati ya Serikali na Sekta binafsi kujenga kiwanda cha dawa nchini ambapo utafanyika kwa haraka ili kukamilikia mpaka kufikia mwishoni mwa mwaka 2019” alisema Bw. Bwanakunu.

DKT. NDUGULILE AAGIZA WATUMISHI WA AFYA KUZINGATIA MAADILI YA UTUMISHI WA UMMA KATIKA UTENDAJI WAO.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile akikagua ujenzi wa majengo mapya katika kituo cha afya cha Lupiro wilayani Luanga, Mkoa wa Morogoro.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile akisikiliza kero kutoka kwa Florence Kilumanga wakati alipotembelea Hospitali ya Mahenge iliyopo wilayani Luanga mkoa wa Morogoro.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile (katikati) akitoa maelekezo kwa Mganga Mkuu wa Wilaya Dkt. Rajabu Risasi (kushoto) wakati alipotembelea Hospitali ya Mahenge iliyopo wilaya ya Ulanga mkoani Morogoro. Kulia ni Mkuu wa Wilaya hiyo Ngollo Malenya.

NA WAMJW-ULANGA

Naibu waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile amewaasa watumishi wa afya nchini kote kuzingatia maadili katika utendaji ili kutoa huduma za afya kwa wananchi kwa kiwango kilicho bora.

Dkt. Ndugulile amesema hayo wakati alipofanya ziara na kukagua hali ya utoaji wa huduma za afya katika Hospitali ya Mahenge iliyopo wilaya ya Luanga mkoani Morogoro.

Katika ziara hiyo, Dkt. Ndugulile alionekana kushangazwa na baadhi ya watoa huduma hospitalini hapo kutozingatia muda wa kuwepo kazini muda wote.

 Amebaini hilo wakati alipotembelea maabara ya Hospitali na kukuta kumbukumbu za mnyororo wa baridi hazijaandikwa ipasavyo, damu na vitendanishi vikiwekwa katika Friji moja na mpangilio mzima wa maabara hiyo kuwa mbovu.

“Niwakumbushe wataalamu wa maabara, taaluma ambazo wamezisoma hazibadiliki hata wakiwa kazini, kuna misingi ya taaluma ambayo tunayo, vitu vidogo kama Temperature Chart vinaonesha umakini na weledi kwa mwana taaluma ambaye tumemkabidhi jukumu lile”. Amesema Dkt. Ndugulile.

Kutokana na hali hiyo, Dkt. Ndugulile aliagiza kuondolewa msimamizi wa maabara Donald Masamaki na kuletwa mtu mwingine atakayezingatia taaluma na weledi katika utoaji wa huduma za maabara na afya kwa ujumla.

Aidha, Dkt. Ndugulile alishangazwa na malalamiko ya wananchi kuhusu wahudumu wa maabara kuwaagiza wagonjwa kwenda kupima Malaria katika vituo vya watu binafsi huku kipimo cha MRDT kikiwepo stoo ya dawa. Kufuatia hali hiyo Naibu Waziri huyo aliagiza Kamat ya Ulinzi na Usalama ya Wilaya pamoja na Mkuu wa Wilaya hiyo Ngollo Malenya kufuatilia kwa ukaribu na kubaini ukweli wa jambo hilo na wale watakaobainika wachukuliwe hatua.

“Niwakumbushe watu wa maabara, nimkumbushe mganga mfawidhi kuhakikisha kwamba vipimo vyote vinakuwepo Hospitali. Nimepata malalamiko kutoka kwa wananchi, mpaka vipimo vya MRDT vya Malaria watu wanaambiwa wakapime nje”. Ameongeza Dkt. Ndugulile.

Pamoja na hayo, Naibu Waziri aliagiza kufanyiwa marekebisho kwa baadhi ya kasoro zilizoonekana Hospitalini hapo ikiwa ni pamoja na kuagiza kununuliwa mafaili ya kutunzia kumbukumbu za mgonjwa, kujengwa kwa sehemu ya kuchomea taka, kurekebisha mfumo wa mapato na kuiagiza bohari ya dawa (MSD) kuhakikisha dawa zote muhimu zinapatikana Hospitalini hapo.

Katika kuhitimisha ziara yake wilayani Ulanga, Dkt. Ndugulile aliahidi kuipatia Halmashauri ya Wilaya ya Ulanga gari la wagonjwa (Ambulance) katika mgao unaofuata.

Naibu Waziri Dkt. Ndugulile alihitimisha ziara yake mkoani Morogoro kwa kutembelea kituo cha afya cha Lupiro na kukagua ujenzi wa majengo mapya ya chumba cha kuhifadhia maiti, wodi ya wanawake, maabara na nyumba ya daktari. Huku kwa kiasi kikubwa akionekana kuridhika na ujenzi wa kituo hicho.

MAAFISA AFYA WATAKIWA KUSIMAMIA USAFI WA MAZINGIRA ILI KUTOKOMEZA MALARIA

Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu akisisitiza jambo mbele ya Wabunge wa kamati ya Huduma za Jamii na Wadau wa Masuala ya Afya (hawapo kwenye picha) katika uzinduzi wa taarifa ya utafiti wa Viashiria vya Malaria nchini.

Mkurugenzi Mkuu wa Ofisi ya Taifa ya TAKWIMU Dkt. Albina Chuwa akionesha Kitabu cha Taarifa ya Takwimu za Viashiria vya Ugonjwa wa Malaria mbele ya Wabunge wa Kamati ya Huduma za Jamii na Wadau wa Masuala ya Afya wakati wa uzinduzi wa taarifa ya utafiti wa Viashiria vya Malaria nchini.

 Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu wakioneshana jambo na Mkurugenzi Mkuu wa Ofisi ya Taifa ya TAKWIMU Dkt. Albina Chuwa (wakatikati).

Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu akikata utepe kuashiria uzinduzi rasmi wa taarifa ya utafiti wa Viashiria vya Malaria nchini uliofanyika leo jijini Dar es salaam.

Wabunge wa Kamati ya Huduma za Jamii na Wadau wa Masuala ya Afya wakifuatilia taarifa ya Utafiti ya Viashiria vya ugonjwa wa Malaria nchini iliyokuwa ikisomwa na Mgeni rasmi Waziri wa Afya Mhe. Ummy Mwalimu (hayupo kwenye Picha) jijini Dar es salaam.

Picha ya pamoja ikiongozwa na Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu wakati wa  uzinduzi wa taarifa ya utafiti wa Viashiria vya Malaria nchini.

 

MAAFISA AFYA WATAKIWA KUSIMAMIA USAFI WA MAZINGIRA ILI KUTOKOMEZA MALARIA

Na WAMJW – Dar Es Salaam.

Waziri wa Afya, Maendeleo ya Jamii, jinsia, Wazee na Watoto Mhe. Ummy Mwalimu amewaagiza Maafisa Afya nchini kusimamia kwa ukamilifu usafi wa mazingira katika jamii ili kutokomeza ugonjwa wa Malaria.

 

Waziri Ummy ametoa agizo hilo leo Oktoba 22, 2018 wakati akizindua Taarifa ya Utafiti wa Viashiria vya Ugonjwa wa Malaria wa Mwaka 2017 katika Ukumbi wa Karimjee jijini Dar Es Salaam

“Nawaagiza Maafisa Afya,  badala ya kupoteza muda mwingi wa kukagua migahawa, bucha za nyama na sehemu ambazo wanajua zinaleta fedha, tunataka pia wajikite katika kusimamia usafi wa mazingira  katika Kata, Vijiji na Mitaa yetu”Alisema Mhe. Ummy.

 

Katika kuhakikisha hali ya usafi wa mazingira inakuwa endelevu, Waziri Ummy ameagiza Mabalaza yote ya Halmashauri nchini kuweka Sheria na adhabu kali kwa wote ambao wamekuwa wagumu katika kushiriki katika usafi wa mazingira huku Waganga Wakuu wa Halmashauri zote nchini kuhakikisha wanasimamia vyema utekelezaji wa kanuni na sheria za afya na usafi wa mazingira jambo ambalo litaibua chachu ya ushindi katika mapambano dhidi ya Ugonjwa wa Malaria.

“Niyatake Mabalaza ya Hamashauri kuweka hatua kali, sheria kali na adhabu kali kwa wote ambao hawashiriki katika usafi wa mazingira” alisema Waziri Ummy.

Licha ya hivyo Waziri Ummy alisema kuwa Serikali kupitia Wizara inaendelea kutekeleza Mpango endelevu wa ugawaji vya ndarua kupitia wanafunzi wa shule za msingi, kupitia Kliniki za wajawazito na watoto, ambayo hujulikana kama Chandarua Kliniki huku hadi sasa jumla ya vyandarua milioni 31 vimeshagawiwa nchini kote.

 

Aidha, Waziri Ummy alisema kuwa Matokeo ya mpango endele u wa ugawaji wa vyandarua yameonesha kuwa asilimia 78 ya kaya nchini Tanzania zinamiliki angalau chandarua kimoja chenye dawa, Katika utafiti wa Afya ya Uzazi na Mtoto na Viashiria vya Malaria wa mwaka 2015-16, ni asilimia 66 tu za kaya zilikuwa zinamiliki angalau chandarua kimoja chenye dawa huku Umiliki wa vyandarua vyenye dawa ni wa kiwango cha juu kwa kaya za mijini (asilimia 81) ikilinganishwa na kaya za vijijini (asilimia 77). 

 

Kwa upande mwingine Waziri Ummy alitaja Halmashauri zenye maambukizi ya kiwango cha juu ni pamoja na Kakonko 30.8%, Kasulu DC 27.6%, Kibondo DC 25.8%, Uvinza 25.4%, Kigoma DC 25.1%, Buhigwe 24%, Geita DC 22.4%, Nanyamba TC 19.5%, Muleba DC 19.4%, Mtwara DC 19.1%, huku Halmashauri zenye  maambukizi ya kiwango cha chini ya asilimia 0.1 ni Mbulu TC, Mbulu DC, Hanang, Hai, Siha, Moshi MC, Mwanga, Kondoa TC, Meru DC, Arusha CC, Arusha DC,  Munduli, Ngorongoro, Rombo DC

MWISHO

DKT. NDUGULILE AAHIDI UJENZI WA HOSPITALI MPYA YA WILAYA YA RUFIJI.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile akikagua dawa zilizopo katika stoo ya Hospitali ya Utete wilayani Rufiji kuhakikisha kama zina nembo ya serikali wakati wa muendelezo wa ziara yake katika mkoa wa Pwani.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile (kushoto) akifafanuliwa jambo na Mganga Mkuu wa wilaya ya Rufiji Dkt. Juma Abdallah wakati alipofanya ziara katika Hospitali ya Utete iliyopo wilayani humo. Wengine ni Mganga Mfawidhi wa Hospitali hiyo Dkt. Ibrahim Mohamed (katikati) na mbunge wa Rufiji Mohamed Mchengelwa.

NA WAJMW-RUFIJI
Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile ameahidi ujenzi wa Hospitali mpya ya Utete ili kuboresha huduma za afya wilayani Rufiji.

Dkt. Ndugulile amesema hayo  wakati alipokuwa anaendelea na ziara katika Mkoa wa Pwani ambapo alionekana kutoridhishwa na majengo ya Hospitali hiyo kongwe iliyojengwa kipindi cha ukoloni na majengo yake yakionekana chakavu.

"Naomba niwe balozi wenu, nimejionea mwenyewe majengo ya Hospitali hii, kwa kweli ni chakavu sana” alisema Dkt. Ndungulile na kuendelea “sasa baada ya nyinyi kuomba serikali ifanye ukarabati wa Hospitali hii, mimi nitahakikisha tunapata pesa ya kujenga Hospitali mpya"

Aidha, Dkt. Ndugulile alionekana kutoridhishwa na nyumba wanazoishi madaktari wa Hospitali hiyo huku zikionekana kuwa chakavu zinazohatarisha maisha ya watu wanaoishi humo na kuahidi kuzifanyia ukarabati ikiwa ni pamoja na kutafuta fedha kwa ajili ya kujenga nyumba mpya za kisasa.

Kwa upande wake Mkuu wa Wilaya ya Rufiji Juma Abdallah amesema hali ya watumishi katika sekta ya afya siyo nzuri hasa kwa wenye taaluma mbalimbali. Amesema kuna upungufu wa asilimia 49 ya watumishi wenye ujuzi unaohitajika, huku akifafanua upungufu mkubwa katika kada ya wauguzi.

"Katika kada ya wauguzi tuna upungufu wa wauguzi 146, Madaktari 4, madaktari wasaidizi 11, wataalam wa mionzi 15, wataalam wa maabara 8, ustawi wa jamii 5, maafisa afya 12, makatibu wa afya 3 na watunza kumbukumbu za Hospitali 10". Amesema Mkuu huyo wa wilaya.

Pia amesema wilaya hiyo haina daktari bingwa wa aina yeyote na mtaalamu wa mionzi baada ya aliyekuwepo kuondoka mara baada ya kuripoti kwa maelezo kuwa mazingira ya Rufiji siyo rafiki kwake.

Kwa upande wa hali ya upatikanaji wa dawa, vifaa tiba na vitendanishi, Mkuu wa Wilaya hiyo amesema upatikanaji wa wake ni wa wastani.  Hadi kufikia mwezi Septemba 30, 2018 dawa zinazofuatiliwa Tracer Medicine upatikanaji wake ni asilimia 90.6 na dawa zingine upatikanaji wake ni kwa zaidi ya asilimia 55.

Kufuatia hali hiyo, Naibu Waziri amemuagiza Mganga Mkuu wa Mkoa wa Pwani Dkt. Yudas Ndungile kuhakikisha anatafuta mtaalam wa mionzi kutoka Wilaya nyingine ili kutoa huduma katika wilayani humo. Aidha Dkt. Ndugulile ameahidi kufanyia kazi suala hilo la upungufu wa watumishi hao muhimu.

Wakati huo huo Dkt. Ndugulile alihitimisha ziara yake katika Mkoa wa Pwani kwa kutembelea vituo vya afya vya Ikwiriri ambacho kimekamilisha ujenzi ya Wodi ya watoto, wodi ya Wanawake, jengo la kuhifadhia maiti na jengo la kufulia nguo.

Kwa upande wa kituo cha afya Kibiti, Naibu Waziri huyo ameonekana kutoridhika na huduma za afya zinazotolewa katika kituo hicho na kuona kuna ubadhirifu wa fedha za umma katika ujenzi wa miundombinu ya maabara, wodi na chumba cha upasuaji huku akiagiza kamati ya ulinzi na usalama kuchunguza na kuwachukulia hatua wote watakaobainika na ubadhirifu wa fedha za umma.

Katika kuhitimisha ziara yake katika Mkoa wa Pwani Dkt. Ndugulile alitembelea ujenzi wa kituo cha Bungu kwa lengo la kukagua miundombinu na hali ya utoaji huduma za afya, ambapo aliridhishwa na maendeleo ya kituo hicho na kuahidi serikali kuendelea kusaidia katika ujenzi huo lengo likiwa ni kusogeza huduma za afya karibu zaidi na wananchi.

MWISHO

MARUFUKU MGONJWA KWENDA KUNUNUA DAWA NJE IKIWA DAWA ZIPO

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile (katikati) akisikiliza maelezo kutoka kwa Fundi msanifu wa wilaya ya Mafia Ramadhan Madenge kuhusiana na mchoro wa kituo cha afya cha Kilongwe.

 

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile (katikati) akisikiliza maelezo kutoka kwa Mwenyekiti wa kijiji cha Kifinge Hamis Omary   (kushoto) wakati alipotembelea kuona maendeleo ya ujenzi wa zahanati ya kijiji hicho.

 

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile (kushoto) akionesha moja ya dawa za serikali wakati alipofanya ziara kuona hali ya utoaji wa huduma za afya katika Hospitali ya wilaya ya Mafia kuona.

 

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile akisikiliza maelezo kutoka kwa mganga mkuu wa wilaya ya Mafia Dkt. Zuberi Mzige kuhusiana na mchoro wa jengo la huduma kwa wagonjwa wa bima ya afya wakati wa ziara katika Hospitali ya Wilaya hiyo.

MARUFUKU MGONJWA KWENDA KUNUNUA DAWA NJE IKIWA DAWA ZIPO. 

Na WAMJW-MAFIA

SERIKALI kupitia Wizara ya Afya,  Maendeleo ya Jamii, Jinsia, Wazee na Watoto imepiga marufuku kwa watoa dawa kuwaandikia wagonjwa kwenda kununua kwenye maduka binafsi ikiwa kwenye kituo kuna dawa na vifaa tiba vya kutosha. 

Hayo yamezemwa na Naibu Waziri wa Afya , Maendeleo ya Jamii, Jinsia Wazee na Watoto Dkt. Faustine Ndugulile wakati alipotembelea Hospitali ili kuangalia hali ya utoaji huduma Wikayani Mafia . 

"Nauagiza uongozi wa hospitali ya wilaya ya Mafia mkoani Pwani kuwarudishia wagonjwa wote gharama za vifaa tiba na dawa walizonunua katika maduka binafsi ambazo zinapatikana Hospitalini hapo" alisema Dkt.  Ndugulile. 

Aidha Dkt. Ndugulile amesema kuwa  amebaini baadhi ya wagonjwa walioandikiwa kwenda kununua dawa na vifaa tiba katika maduka binafsi huku baadhi ya dawa hizo zikiwepo katika stoo ya kuhifadhia dawa.

Dkt. Ndugulile amemuagiza  Mkurugenzi Mtendaji wa Halmashauri na Mganga Mkuu wa Wilaya ahakikishe wanawarudishia wagonjwa wote gharama walizotumia kununua dawa nje ya Hospitali hiyo.  

Pia Dkt. Ndugulile alishangazwa na Hospitali hiyo kutokuwa na dawa na vifaa tiba muhimu huku serikali ikiwa imetenga kiasi cha Tsh. Bilioni 270 kuanzia mwaka 2015/16 kutoka bilioni 31 za hapo awali, ikiwa na lengo la kuhakikisha dawa zote zinapatikana katika Hospitali na vituo vyote vya afya nchini.

Vikevike Dkt. Ndugulile  ameuagiza uongozi wa wilaya ya Mafia kuhakikisha bajeti ya dawa inapitiwa yakinifu na kutekelezwa ili kuepuka changamoto ambazo zinaweza kuepukika za ukosefu wa dawa na vifaa tiba muhimu na kuleta usumbufu kwa wakazi wa wilaya hiyo.

Amebaini upungufu huo wa dawa na vifaa tiba baada ya kutembelea wodi za watoto na akina mama waliojifungua na kuelezwa na baadhi ya wagonjwa hao kununua dawa na vifaa tiba vya kusaidia kujifungua nje ya Hopitali hali ambayo imekua kero kwa wagonjwa wanaoenda kutibiwa katika Hospitali hiyo.

Wakati huo huo Dkt. Ndugulile amesitisha ukarabati wa jengo la wagonjwa wa bima baada ya kuona kuna ubadhirifu wa fedha ambao hauendani na mazingira halisi ya ukarabati huo.

Pamoja na hayo Dkt. Ndugulile amefanya  ziara katika kituo cha afya cha Kilongwe na zahanati ya kifinge na kutoridhishwa na  maendeleo ya vituo hivyo huku akibaini utaratibu usiofaa wa manunuzi ya vifaa vya ujenzi na kuamuru Halmashauri hiyo ifuate utaratibu wa manunuzi wa Force Account. 

Sambamba na hilo Dkt. Ndugulile alisitisha   mara moja ukarabati wa jengo katika zahanati hiyo  huku akiagiza kamati ya ulinzi na usalama ya wilaya ikishirikiana na kamati ya ujenzi kufuatilia uhalisia wa gharama hiyo.

Kwa upande wake Mkuu wa Wilaya ya Mafia Shaibu Mnunduma amemshukuru Naibu waziri huyo kufanya ziara kisiwani humo huku akiahidi kuzifanyia kazi changamoto zote zilizobainika ili kutoa huduma bora za afya kwa wananchi wa wilaya hiyo.

Naye   Fundi msanifu wa Wilaya ya Mafia Ramadhan Madenge alisema kuwa kuna  ukarabati wa jengo hilo unagharimu takribani Tsh. Milioni 94. 

 

TAARIFA KWA UMMA

DKT NDUGULILE AGAWA KADI ZA BIMA YA AFYA KWA WASANII ZAIDI YA 100

Naibu Waziri wa Afya, Maendeleo ya Jamii, Jinsia, Wazee na Watoto Dkt Faustine Ndungulile akisema jambo katika mkutano wa Umoja wa Wasanii wa Muziki uliofanyika katika ukumbi wa NSSF Ilala, Jijini Dar es salaam.

  

Naibu Waziri wa Afya, Maendeleo ya Jamii, Jinsia, Wazee na Watoto (katiki mstari wa chini) katika picha ya pamoja na wadau wa mkutano Umoja wa Wasanii wa Muziki uliofanyika katika ukumbi wa NSSF Ilala, Jijini Dar es salaam huku akiwa ameshika sampuli za kadi ya bima ya afya.

Wadau wa mkutano wa Umoja wa Wasanii wa Muziki wakisikiliza mada.

Na. WAMJW - DAR ES SALAAM.

Naibu Waziri wa Afya, Maendeleo ya Jamii, Jinsia, Wazee na Watoto Mhe Dkt Faustine Ndugulile, leo tarehe 13/10/2018 ameshiriki katika mkutano wa Umoja wa Wasanii wa Muziki uliofanyika katika ukumbi wa NSSF Ilala, Jijini Dar es salaam.

Akizungumza kabla ya kukabidhi Kadi hizo za bima ya Afya Mhe Ndugulile mewataka wasanii kutumia vipaji vyao kuelimisha jamii hususani katika masuala mbalimbali yanayohusu jamii kama unyanyasaji wa kijinsia na unyanyasaji wa watoto.

Vilevile amewahasa wasanii kuzingatia maadili ya taifa katika kufanya kazi zao kwani wapo waimbaji ambao wamekuwa wakikiuka maadili na nyimbo zao zinapofungiwa wanalalamika bila kujua kuwa wao ndio wenye makosa.

Akijibu ombi la wasanii kuwapa kipaumbele cha bei nafuu ya bima ya afya, Mhe. Ndugulile amesema kuwa kwa kuzingatia kuwa kugharamia huduma za afya ni changamoto, serikali imetoa maelekezo kwa Mfuko wa Taifa wa Bima ya Afya (NHIF) kuweka vifurushi rafiki kwa wananchi wa kawaida vitakavyoendana na mahitaji ya mwananchi mmoja mmoja kuchagua kulingana na Mahitaji yake.

Aidha, Mhe Ndugulile amesema serikali ikitoa sera mpya ya afya itamtaka kila mwananchi kujiunga na bima ya afya kwa lazima ili watu wote waweze kupata matibabu kwa urahisi pindi wanapoenda katika vituo vya kutolea huduma za afya.

Akizungumzia matibabu bure kwa wazee, Mhe Ndugulile amesisitiza kuwa katika Sera Mpya ya Afya itakayotolewa na serikali itaboresha zaidi na kuweka utaratibu mzuri wa kuwahudumia wazee kwani kutokana na utafititi uliofanywa na Wizara, magonjwa mengi ya wazee ni yale ambayo yanajulikana na mara nyingi si ya kuambukiza.

Pia amewataka Mfuko wa Bima ya Afya (NHIF) na Mfuko wa Taifa wa Hifadhi ya Jamii (NSSF) kuendelea kubaini changamoto na kufanya maboresho ya namna bora zaidi ya kuwapatia bima za afya wananchi hasa wale ambao hawako katika mfumo rasmi wa ajira.

UMEZAJI DAWA NDIYO SULUHISHO KAMILI KATIKA KUDHIBITI MAGONJWA YALIYOKUWA HAYAPEWI KIPAUMBELE.

Mkuu wa Mkoa wa Ruvuma, Bi. Christina Mndeme (aliyesimama) akisema jambo katika Semina ya uraghibishaji na uhamasishaji wa Magonjwa yaliyokuwa hayapewi kipaumbele iliyojumuisha Wakuu wa Wilaya pamoja wataalam mbalimbali toka Mamlaka za Serikali za Mitaa za Mkoa wa Ruvuma (hawapo pichani)

Kaimu Meneja wa Mpango wa Kudhibiti Magonjwa Yaliyokuwa Hayapewi Kipaumbe Kutoka Wizara ya Afya, Maendeleo ya Jamii, Jinsia, Wazee na Watoto Bwana Oscar Kaitaba (aliyesimama) akiongea na washiriki wa Semina ya uraghibishaji na uhamasishaji wa Magonjwa yaliyokuwa hayapewi kipaumbele iliyojumuisha Wakuu wa Wilaya pamoja wataalam mbalimbali toka Mamlaka za Serikali za Mitaa za Mkoa wa Ruvuma (hawapo pichani)

Mratibu wa Magonjwa yaliyokuwa hayapewi kipaumbele Mkoa wa Ruvuma Dkt. Charles Hinju (aliyesimama) akitoa mada katika Semina ya Uraghibishaji na uhamasishaji wa Magonjwa yaliyokuwa hayapewi kipaumbele kwa Viongozi wa Wilaya na Wataalam toka Mamlaka za Serikali za Mitaa Mkoa wa Ruvuma.

Viongozi pamoja na wataalam toka Mamlaka za Serikali za Mitaa Mkoa wa Ruvuma wakisikiliza mada katika Semina ya Uraghibishaji na uhamasishaji wa Magonjwa yaliyokuwa hayapewi kipaumbele iliyofanyika katika Ukumbi wa Mipango Mkoani Ruvuma.

Na WAMJW - RUVUMA

Pamoja na juhudi zinazofanywa na Serikali na wadau mbalimbali katika kudhibiti magonjwa yaliyokuwa hayapewi kipaumbele, mwamko wa wananchi wa Mkoa wa Ruvuma kutumia kingatiba bado upo chini hivyo kukwamisha malengo yaliyokusudiwa.

Hayo yamesemwa na Mkuu wa Mkoa wa Ruvuma Bi. Christina Mndeme alipokuwa akifungua semina ya uraghibishaji na uhamasishaji wa kudhibiti magonjwa yaliyokuwa hayapewi kipaumbele kwa Wakuu wa Wilaya pamoja na wataalam wa Mamlaka za Serikali za Mitaa za Mkoa wa Ruvuma iliyofanyika katika ukumbi wa mipango Oktoba 13, 2018.

Mkuu huyo wa Mkoa aliyataja magonjwa ambayo bado yanaendelea kusumbua wananchi mkoani humo kuwa ni; Usubi, Minyoo ya tumbo pamoja na kichocho huku akiwapongeza wataalam kwa kufanikiwa kwa kiasi kikubwa kudhibiti magonjwa ya Vikope (trakoma), Matende pamoja na Mabusha.

Bi. Mndeme amesema kuwa sehemu kubwa ya jamii bado haijahamasika kumeza dawa kutokana na uelewa mdogo wa athari za magonjwa hayo huku wananchi wengi bado wakiwa na imani potofu juu ya dawa hizo.

“Magonjwa haya yamekuwa yakiathiri rika zote katika jamii, tumeona Watoto wakishindwa kwenda shuleni na kusababisha taaluma kushuka huku kwa watu wazima wakipata ulemavu wa kudumu hivyo kushusha nguvu kazi ya Taifa” alisema Bi Mndeme.

Naye Meneja wa Mpango wa Kudhibiti Magonjwa Yaliyokuwa Hayapewi Kipaumbele kutoka Wizara ya Afya, Maendeleo ya Jamii, Jinsia, Wazee na Watoto Bwana Oscar Kaitaba, amesema kuwa lengo la Serikali ni kuhakikisha kuwa magonjwa hayo yanadhibitiwa kikamilifu hivyo kuwaomba wataalam walioshiriki semina hiyo kusaidia Serikali katika kuelimisha na kuhamasiha jamii kutumia kingatiba ili kudhibiti magonjwa hayo.

“Njia bora ya kudhibiti magonjwa haya ni kuhakikisha wananchi katika maeneo tunayotoka wanakunywa dawa zinazopatikana katika hospitali zetu” Alisema Bwana Kaitaba.

Kwa upande wake Mratibu magonjwa yaliyokuwa hayapewi kipaumbele Mkoa wa Ruvuma Dkt. Charles Hinju amesema shughuli ya kuhamasisha wananchi kumeza kingatiba bado inaendelea kutolewa licha ya changamoto wanazokutana nazo.

“Kwa mwaka 2016 jumla ya watu 1,052,907 kati ya 1,420,317 walipata kingatiba sawa na asilimia 74 huku kwa mwaka 2017 watu 1,192,390 kati ya 1,413,751 walipata kingatiba sawa na asilimia 84.3” alisema DKt. Hinju.

Dkt. Hinju amezitaja changamoto za kuchelewa kwa dawa na rasilimali fedha kuwa zinaathiri ufanisi wa kazi huku pia Halmashauri nyingi hazitengi fedha ili kufanikisha kazi ya kukabiliana na magonjwa hayo.

Akifunga semina hiyo, Mkuu wa Mkoa wa Ruvuma Bi. Christina Mndeme ameishukuru Wizara ya Afya, Maendeleo ya Jamii, Jinsia, Wazee na Watoto kwa kuandaa Mpango huo wa kudhibiti magonjwa hayo na kuishauri Wizara kuandaa vipindi maalum kwenye vyombo vya habari ili kuhamasisha jamii kumeza dawa za kutibu magonjwa hayo huku akiwataka wataalam katika maeneo wanayotoka kuelimisha jamii kuachana na imani potofu juu ya dawa hizo.

Aidha Mkuu huyo wa Mkoa amewataka Waganga Wakuu wa Wilaya kuwa na takwimu sahihi za idadi ya watu wanaofika katika vituo vya afya na hospitali ili kusaidia katika maombi ya dawa toka bohari kuu ya dawa.

MWISHO

TAARIFA KWA UMMA

JAMHURI YA MUUNGANO WA TANZANIA
WIZARA YA AFYA, MAENDELEO YA JAMII, JINSIA, WAZEE NA WATOTO

TANGAZO KWA UMMA

 

Katibu Mkuu wa Wizara ya Afya, Maendeleo ya Jamii, Jinsia, Wazee na Watoto (Afya) anawatangazia watumishi wote waliopata udahili wa kusoma masomo ya Shahada ya Uzamili (Masters Degree) katika fani za Afya kwa mwaka 2018/2019, kwamba Wizara inaanza kupokea maombi ya Ufadhili kwa mwaka 2018/2019. Maombi haya yatawasilishwa kwa njia ya kielektroniki kwa kujisajili kupitia fomu zilizopo kwenye tovuti ya Wizara www.moh.go.tz (https://sponsorship.moh.go.tz).Maombi yatakayofanyiwa kazi ni yale yaliyowasilishwa kwa njia ya mfumo huu tu, hivyo waombaji waliowasilisha maombi yao kabla ya tangazo hili wanapaswa kurudia kuomba kupitia  utaratibu huu.

Ufadhili huu ni kwa ajili ya kulipiwa ada ya mafunzo (Tuition fee), pamoja na posho ya utafiti  (Dissertation allowance). 

Vigezo vitakavyotumika kuchagua ni hivi vifuatavyo :

Kuwasilishwa kwa maombi rasmi ya ufadhili kwa njia ya mfumo (online application)

Mwombaji kuwa Raia wa Tanzania.

Awe amedahiliwa Chuoni kuanza masomo kwa mwaka wa kwanza 2018/2019

Kipaumbele kitatolewa kwa:

Watumishi wa Serikali waliomo kwenye sekta ya Afya wanaofanya kazi katika vituo vilivyoko Wilayani/Mikoani hususani katika Hospitali za Rufaa za Mikoa ambao baada ya mafunzo watarudi kuendelea kufanya kazi katika vituo vyao vya awali, au watapangiwa vituo vya kazi sehemu nyingine yeyote nchini

Waombaji waliodahiliwa katika fani ambazo ni za msingi katika utoaji wa huduma za rufaa katika Hospitali za Rufaa za Mikoa. Nyanja hizo ni Anaesthisiology, Surgery, Neurosurgery, Obstetrics and Gynaecology, Orthopaedics Surgery, Emergency Medicine, Paediatrics, Internal Medicine, Critical Care in Nursing na Midwifery and Womens Health, Radio-pharmacy,Epidemiology and Lab.Management

Waombaji waliodahiliwa katika nyanja za Ubingwa/Ubingwa wa Juu (Specialities na Super-specialities) zenye umuhimu mkubwa katika Hospitali za Kitaifa (kama Cardiology, Nephrology,Opthalmology,Radiography na Oncology) ili kujenga uwezo wa ndani ya nchi katika jitihada za kupunguza wagonjwa wa rufaa wanaotibiwa nje ya nchi.

Aidha, mwombaji atatakiwa aambatanishe nyaraka zifuatazo wakati wa kufanya maombi:

Barua ya ruhusa ya masomo kutoka kwa mwajiri wake

Barua ya udahili kutoka chuoni

Cheti cha taaluma

Cheti cha kuzaliwa

Mwisho wa kupokea maombi haya ni tarehe  10/11/2018.  

Imetolewa na:

Katibu Mkuu,

Wizara ya Afya, Maendeleo ya Jamii, Jinsia, Wazee na Watoto

Chuo Kikuu Dodoma,

Kitivo cha Sanaa na Sayansi ya Maendeleo ya Jamii

S.L.P 743

DODOMA

11/10/20

WAGONJWA WA MACHO 300 NCHINI WAFANYIWA UPASUAJI NDANI YA SIKU TANO

Mtaalam kutoka Taasisi inayojishugulisha na afya ya macho ONA  Bi. Haika Urasa kulia akitoa miwani ya kusomea kwa mmoja wa wakazi wa Dodoma aliyefika kupata huduma ya afya ya macho katika viwanja vya Nyerere Square wakati wa kilele cha maadhimisho ya siku ya Afya ya Macho yaliyofanyika mkoani humo leo.

Mtaalamu wa magonjya yasiyoyakuambukiza Dkt. Nleminyanda Hezron katikati akitoa huduma za kupima sukari kwa baadhi ya wakazi wa Dodoma kupata huduma hizo katika viwanja vya Nyerere Square wakati wa kilele cha maadhimisho ya siku ya Afya ya Macho yaliyofanyika mkoani humo leo.

MMoja ya Wataalam  wa Afya ya macho akitoa elimu juu ya afya ya macho kwa baadhi ya wakazi wa Dodoma waliofika  katika viwanja vya Nyerere Square wakati wa kilele cha maadhimisho ya siku ya Afya ya Macho yaliyofanyika mkoani humo leo.

Baadhi ya wakazi wa Dodoma waliofika  katika viwanja vya Nyerere Square  wakisubiri kupata huduma ya afya ya macho na magonjwa yasiyoyakuambukiza wakati wa kilele cha maadhimisho ya siku ya Afya ya Macho yaliyofanyika mkoani humo leo.

NA WAMJW-DODOMA

Wagonjwa 300 waliobainika kuwa na matatizo ya macho wamefanyiwa upasuaji na kurejeshewa hali ya kuona vizuri ndani ya siku 5 ambapo watu wenye matatizo ya macho takribani 700 wamefanyiwa uchunguzi.

Hayo yamesemwa na Kaimu Meneja wa Mpango wa Huduma za Macho kutoka Wizara ya Afya, Maendeleo ya Jamii, Jinsia, Wazee na Watoto Dkt. Bernadetha Shilio wakati wa kilele cha maadhimisho ya siku ya siku ya afya ya macho duniani kilichofanyika mapema leo katika viwanja vya Nyerere jijini Dodoma.

“Siku ya afya ya macho duniani ina lengo kuu la kuhamasisha utekelezaji wa dira ya kimataifa ya kutokomeza upofu unaozuilika ifikapo mwaka 2020, na kutathmini haki ya kuona kwa wote ambapo mwaka 2003 serikali ya Tanzania iliungana na mataifa mengine duniani katika kutekeleza azimio hilo”. Alisema Dkt. Shilio.

Dkt. Shilio amesema Serikali ya Tanzania inashirikiana na mataifa mengine duniani kuadhimisha siku ya afya ya macho ikiwa na lengo la kutoa elimu kwa jamii, kutoa huduma za uchunguzi wa macho pamoja na kufanya upasuaji kwa wagonjwa ambao watabainika kuwa na matatizo.

Pia Dkt. Shilio ameiasa jamii ya kitanzania kuzingatia kanuni sahihi za utunzaji wa macho ili kuepuka madhara yanayoweza kujitokeza na kusababisha uono hafifu na kupelekea upofu.

“Matumizi ya rangi na kope bandia kwenye ukingo wa macho, kuvaa miwani bila kupima, kutumia dawa za mgonjwa mwingine wa macho bila ushauri wa daktari, kutokula vyakula bora vyenye virutubisho na kutokua na tabia ya kupima macho angalau mara moja kwa mwaka vimetajwa kuwa visababishi vikubwa vya kuathiri afya ya macho” alisema Dkt. Shilio.

Aidha, Dkt. Shilio amesema sambamba na huduma za macho pia kumekua na huduma za uchunguzi na ushauri kwa magonjwa yasiyoambukiza jijini Dodoma, jumla ya watu 400 walifanyiwa vipimo vya sukari, shinikizo la damu na kiwango cha unene. Ambapo asilimia 3 wamekutwa na kiwango cha juu cha sukari, asilimia 47 wamekutwa na shinikizo la juu la damu na asilimia 50 wamekutwa na unene uliopitiliza kiwango.

Kwa upande wake Mgonjwa aliyepata huduma za macho Jijini Dodoma Bi.Veronica Maganga ameishauri serikali kuendelea kutoa elimu, kusogeza na kutoa huduma za macho na uchunguzi wa magonjwa mengine karibu na wananchi ili kuzuia magonjwa yanayoweza kuleta madhara iwapo hayatachunguzwa mapema na kutoa matibabu sahihi.

“Tunaishukuru sana Serikali kwa kutuletea huduma hii kwani wengi tumepata matumaini ya kuona tena kwa uono mkubwa ila wangefanya huduma hii iwe endelevu mpaka vijijini ili kuwanusuru wenye matatizo ya macho” alisema Bi. Veronica.